Властите во Газа го обвинија Израел за ексхумација на гробови и кражба на тела во Кан Јунис

ГАЗА / ИСТАНБУЛ (АА) - Министерството за вакаф на Газа денес ја обвини израелската армија за вршење „ужасен злостор“ со ексхумирање гробови и кражба на останките на Палестинците во јужниот град Кан Јунис, јавува Анадолу.

Министерството соопшти дека израелските дејствија претставуваат „очигледно кршење на сите религиозни и хуманитарни вредности и норми“.

„Во призор што ги надминува сите граници на човештвото и ги руши сите морални, религиозни и меѓународни вредности, окупаторските сили вчера (четврток) во зори извршија уште едно ужасно злосторство со булдожери, ексхумирајќи гробови и крадејќи ги останките на убиените“, се вели во соопштението.

Министерството ги осуди дејствијата како „криминално и варварско однесување што ниедна религија или закон не го дозволува“, додавајќи дека Израел „ја нарушил светоста на мртвите и достоинството на човечките суштества по смртта“.

Министерството посочи дека израелските сили намерно уништиле 40 од 60-те гробишта во Газа „под лажни изговори“.

Израелската армија уби речиси 57.800 Палестинци, повеќето од нив жени и деца, во Газа од октомври 2023 година. Немилосрдното бомбардирање ја опустоши енклавата и создаде услови на глад.