Во Мароко започна гласањето на парламентарните избори

Избирачките места низ Мароко беа отворени утринава, при што гласачите започнаа да гласаат за избор на членови на Претставничкиот дом на земјата, јавува Анадолу.

Гласањето започна во 8 часот и треба да заврши во 19 часот по локално време низ целата земја, соопштија мароканските власти.

Околу 15,8 милиони гласачи се регистрирани за изборите, според официјалните податоци.

Вкупно 28 политички формации се натпреваруваат за 395 пратенички места, при што низ целата земја се регистрирани 7.288 кандидатури.

Ова се 12-ти парламентарни избори одржани во Мароко по стекнувањето независност и шести откако кралот Мохамед VI го презеде престолот во 1999 година.

Изборната кампања започна на 10 септември и заврши на полноќ синоќа, во пресрет на денешното гласање.

Изборите се одржуваат во услови на јавна дебата за вработувањето, економските услови, јавните услуги и политичкото учество, при што ангажманот на младите се наметнува како едно од главните прашања.

Се очекува да се започне со објавување на првичните резултати утре, согласно со официјалниот изборен календар.