Burç Eruygur
05 Февруари 2026•Ажурирај: 05 Февруари 2026
ИСТАНБУЛ (АА) – Вториот ден од втората рунда трилатерални преговори меѓу Русија, Украина и САД за ставање крај на војната меѓу Москва и Киев започна денес во главниот град на ОАЕ, Абу Даби, јавува Анадолу.
„Работиме во истите формати како и вчера: трилатерални консултации, работни групи и понатамошна координација на позициите“, изјави главниот украински преговарач Рустем Умеров на социјалната мрежа Фејсбук.
Втората рунда консултации меѓу делегациите од Москва, Киев и Вашингтон започнаа вчера во престолнината на емиратите, со цел постигнување договор за решавање на тековниот вооружен конфликт, кој подоцна овој месец ќе влезе во својата петта година.
По првиот ден од разговорите, украинскиот претседател Владимир Зеленски во вечерното видеообраќање изјави дека Киев очекува размена на затвореници меѓу Москва и Киев „во блиска иднина“.
„Ги разгледавме привремените резултати од преговорите за денес. Тие ќе продолжат утре. Ќе има и значаен чекор: очекуваме размена на воени заробеници во блиска иднина. Заробениците мора да се вратат дома“, рече Зеленски, на првиот ден од преговорите, по добиениот извештај од украинската делегација, без да наведе дополнителни детали.
Во меѓувреме, рускиот претседателски пратеник Кирил Дмитриев, кој исто така пристигна во Абу Даби за преговорите, вчера изјави дека има „напредок“ и „добро, позитивно движење“ кон постигнување мировен договор меѓу Русија и Украина.
Тој додаде дека руската страна активно соработува и со администрацијата на американскиот претседател Доналд Трамп во насока на обновување на економските односи меѓу Москва и Вашингтон.
