Oliver Towfigh Nia
10 Јануари 2025•Ажурирај: 10 Јануари 2025
БЕРЛИН (АА) – Германскиот канцелар Олаф Шолц го блокира финансискиот пакет за помош на Украина вреден милијарди евра поради несогласувањата со министерката за надворешни работи Аналена Бербок и министерот за одбрана Борис Писториус, објави денес германскиот неделен магазин „Шпигел“, пренесува Анадолу.
Според информациите, Бербок и Писториус сакаат итно да се обезбеди дополнителен буџет од околу 3 милијарди евра за испорака на оружје на Украина пред парламентарните избори во Германија закажани за 23 февруари. Но Шолц смета дека тоа е непотребно.
По распадот на коалицијата на социјалдемократите, зелените и слободните демократи во ноември, Бербок и Писториус веќе почнале да го подготвуваат новиот пакет помош за Украина.
Во него се вклучени три дополнителни системи за противвоздушна одбрана Ирис-Т, дополнителни ракети Патриот, десет самоодни хаубици и муниција за артилерија.
Бербок и Писториус тврдат дека ваквата поддршка би била важен сигнал за Киев, покажувајќи му дека германската воена помош нема да престане, особено со оглед на влошената воена позиција на Украина последниве месеци.
Сепак, канцеларијата на Шолц неформално сигнализирала дека не го поддржува планот за дополнителен буџет, тврдејќи дека не сака идната германска влада да се најде пред свршен чин.
Шолц смета дека нема итна потреба од оваа мерка бидејќи Киев веќе има на располагање доволно средства од Германија за оваа година.
Во привремениот буџет за 2025 година се предвидени околу 4 милијарди евра воена помош за Украина, а дополнително Киев може да се потпре на фондот од 50 милијарди долари обезбеден од Г-7, финансиран од замрзнатите руски државни средства.
Според официјални податоци, од почетокот на војната меѓу Русија и Украина во февруари 2022 година Германија испорачала или наменила оружје за Украина во вредност од 28 милијарди евра.
Во воената помош се вклучени напредно оружје и опрема, како борбени тенкови Леопард 2, противвоздушни тенкови Гепард, борбени возила Мардер и системи за противвоздушна одбрана Патриот и Ирис-Т.
