Делегации од речиси 70 земји протестираа за време на обраќањето на Нетанјаху пред ОН

Делегации од речиси 70 земји ја напуштија салата на Генералното собрание на ОН или ги оставија своите места празни вчера, кога израелскиот премиер Бенјамин Нетанјаху започна со своето обраќање, во знак на масовен протест поради израелската офанзива во Газа и нападите низ регионот, јавува Анадолу.

Прегледот на снимките од 81. Генерално собрание на ОН што го направи Анадолу покажа дека десетици делегации заедно ја напуштиле салата откако Нетанјаху се упатил кон говорницата.

Некои земји оставиле само еден претставник или дипломат од понизок ранг, додека други воопшто не присуствувале на обраќањето.

Меѓу земјите чии претставници се приклучија на протестот беа Турција, Палестина, Тунис, Сирија, Алжир, Јемен, Египет, Ирак, Саудиска Арабија, Јордан, Иран, Катар, Либан, Малезија, Индонезија и Кувајт.

Делегациите на Шпанија, Бразил, Перу, Куба, Нигерија, Гана, Либија, Бангладеш, Авганистан, Оман, Нигер, Мадагаскар, Боцвана, Бахамите, Антигва и Барбуда, Кабо Верде и неколку други земји, исто така, ја напуштија салата или не присуствуваа.

Протестот се случи во услови на континуирана меѓународна осуда на израелската офанзива врз Газа, политиките на Израел на окупираниот Западен Брег и неговите напади врз Либан и Сирија.

Независната меѓународна истражна комисија на ОН во септември 2025 година заклучи дека Израел извршил геноцид врз Палестинците во Газа. Израел го отфрли овој наод.

Нетанјаху, исто така, е предмет на налог за приведување издаден од Меѓународниот кривичен суд на 21 ноември 2024 година поради наводни воени злосторства и злосторства против човештвото извршени во Појасот Газа.

– Неколку западни делегации останаа -

Претставниците на САД, Германија, Аргентина, Унгарија, Србија, Украина, Чешка и Грција останаа во салата на Генералното собрание за време на обраќањето на Нетанјаху.

Велика Британија, Франција, Ирска, Белгија и Норвешка, чии односи со Израел се соочуваат со зголемени тензии поради ситуацијата во Газа, исто така ги оставија своите претставници во салата, како и делегацијата на Европската Унија.

Кина, која повеќепати ги критикуваше постапките на Израел во Газа и на окупираниот Западен Брег, беше претставена од еден дипломат.

Делегациите на Обединетите Арапски Емирати и Бахреин, кои ги нормализираа односите со Израел во рамки на Аврамовите договори, исто така останаа на своите места.

Меѓу другите земји чии претставници беа присутни за време на говорот беа Австралија, Австрија, Канада, Португалија, Полска, Данска, Романија, Словачка, Естонија, Литванија, Луксембург, Исланд, Азербејџан, Казахстан, Мексико, Кенија и Ел Салвадор.

Поради овој потег, големи делови од салата на Генералното собрание беа видливо празни додека Нетанјаху продолжи со своето обраќање.