ИСТАНБУЛ (АА)
Земјите во Европа дозволуваат злосторства од омраза против муслиманите со легализирање на исламофобијата и воведување закони кои забрануваат или ограничуваат практикување на религијата, вели Енес Бајракли, професор на Турско-германскиот универзитет во Истанбул, јавува Анадолу.
„Секоја година гледаме нова земја во Европа која носи нов план, нов закон, партија која ќе им забрани на муслиманите да ја практикуваат својата религија. Тоа може да биде забрана на минариња, забрана на џамии, забрана на хиџаб или забрана на бурка. Таквите прописи се материјализираат секоја година и тоа во Европа е сè понормално“, изјави Бајракли за Анадолу.
По повод Меѓународниот ден за борба против исламофобијата, 15 март, Бајракли за Анадолу зборуваше за моменталната состојба на муслиманите во европските земји.
„Исламофобијата сè повеќе се институционализира и легализира. Во различни делови на Европа се водат дебати за легализација на исламофобијата“, рече тој.
Бајракли, кој е еден од уредниците на годишниот извештај под назив „Европски извештај за исламофобијата“, исто така сподели белешки од претстојниот извештај за 2022 година, истакнувајќи дека три европски земји се покажале како најрадикални за муслиманите во изминатата година.
„Во преден план се три земји, Франција, Австрија и Данска. За жал, во овие земји дебатите за муслиманите се многу радикални, а владите заземаат навистина остри ставови кон муслиманските невладини организации и поединци кои се борат против исламофобијата“, рече Бајракли.
Говорејќи за Меѓународниот ден против исламофобијата, Бајракли рече дека овој датум може да биде камен-темелник во глобалната борба против исламофобијата.
- Нова дебата за бегалците
Говорејќи за 2022 година, која започна со руско-украинската војна во февруари, Бајракли рече дека конфликтот ги променил политичките агенди во многу европски земји, поттикнувајќи нова дебата за бегалците.
„Оваа стара дебата за бегалците и дека Европа е полна и не може да прими повеќе луѓе, одеднаш пропадна. Одеднаш Полска беше подготвена да прифати милиони бегалци, Германија беше подготвена да прифати милиони луѓе од Украина“, рече Бајракли.
Тој, исто така, се осврна на пристапот на медиумското известување во Европа и САД, во кое некои сугерираат дека бегалците од Украина се добредојдени поради нивната боја на кожа, дека се поцивилизирани во однос на сириските бегалци.
„Европа, од друга страна, ги затвораше границите и подигнуваше ѕидови за да ги спречи бегалците кои доаѓаат од други региони преку Егејското и Средоземното Море, што резултираше со илјадници смртни случаи“, рече експертот.
„Ова покажа колку расистички беше овој дискурс. Причината за сè беше религијата, бидејќи овие бегалци беа отфрлени поради нивната религија и бојата на кожата“, рече Бајракли.
- Раст на негативни чувства кон муслиманите
„Пристрасноста и негативните чувства кон муслиманите веројатно ќе се зголемат оваа година“, смета Бајракли.
„Секоја година станува сè потешко за муслиманските поединци, но и за муслиманските невладини организации“, додаде тој.
Бајракли објасни дека „муслиманските невладини организации“, особено во Франција, биле под огромен притисок од француската Влада, а многу од нив биле затворени од властите без никаква судска постапка или докази за екстремизам или радикализам.
„Оваа атмосфера на сомнеж кон муслиманите, кон нивните институции, кон нивните џамии, кон нивниот верски и приватен живот е внесена во наративите на овие земји од страна на политичарите, медиумите и интелектуалците. За жал, станува сè поприфатливо и нормално“, смета Бајракли.
- Избегнување на терминот исламофобија
Како што изјави тој, многу земји во Европа сега не ја признаваат исламофобијата и одбиваат да го користат тој термин.
Наведувајќи примери, тој рече дека Советот на Европа назначил координатор за борба против антимуслиманската омраза, додека тие се воздржуваат од употреба на зборот исламофобија бидејќи се под притисок од земји како Франција.
„Постои политички отпор да не се признае проблемот со исламофобијата. Тие се обидуваат да се извлечат и да си поиграат со овој проблем за да не го употребат тој збор. Кога не го користите зборот, тоа значи, се разбира, дека политички не признавате дека постои проблем“, рече тој.
- Исламофобијата мора политички да се признае како проблем
Годишниот извештај, на кој работи Бајракли, ги евидентира инцидентите и настаните од исламофобија секоја година од 2015 година.
„Извештајот за 2022 година, што ќе биде објавен следната недела, ќе ја покаже состојбата на муслиманите во 23 европски земји“, наведе тој.
„Исламофобијата мора политички да се признае како проблем. Мислам дека ова е првиот чекор. Потоа можеме да зборуваме за стратегиите за борба против исламофобијата“, препорача Бајракли.
Универзитетскиот професор ја истакна важноста од секојдневно евидентирање на злосторствата од омраза кон муслиманите, како и годишното објавување на податоците.
Тој им предложи на невладините организации и академиците да работат на исламофобијата од различни перспективи и да вршат теренски истражувања.
„Исламофобијата не е само предрасуда кон муслиманите. Во прашање е расизам. Исламофобијата е антимуслимански расизам. Тоа е нова форма на културен расизам. И тоа мора да се разбере на овој начин, за да можеме да се бориме со овој проблем на посистематски начин“, изјави Бајракли.
