ЕУ ја критикуваше Русија на 5. годишнина од анексијата на Крим

АНКАРА (АА) - Високата претставничка на Европската Унија (ЕУ) за надворешни работи и безбедносна политика, Федерика Могерини, вчера изјави дека Европската Унија ќе продолжи да ја осудува Русија поради незаконската анексија на Крим, јавува Anadolu Agency (AA).

„ЕУ потврдува дека не признава и ќе продолжи да го осудува ова прекршување на меѓународното право“, изјави Могерини за време на нејзиниот говор во Брисел на 5. годишнина од незаконската анексија на Крим.

Могерини, исто така, ги осуди систематските прекршувања на човековите права против кримските Татари и зголемената руска милитаризација на пристаништето на Крим во Севастопол, велејќи дека тоа продолжува негативно да влијае на безбедноста во Црното Море.

Могерини истакна дека кршењата на меѓународното право во Русија довеле до опасно зголемување на тензиите во теснецот Керч, кој ги поврзува Црното Море и Азовското Море и ги спомна новите санкции на ЕУ за осум руски официјални лица.

Таа изјави дека Крим продолжува да биде приоритет за ЕУ.

Во март 2014 година, Русија го анектираше Крим по нелегалниот референдум, кој привлече меѓународна осуда, бидејќи руските војници го окупираа регионот за време на процесот на гласање.

Заедно со Генералното собрание на ОН, САД, ЕУ и Турција не го признаваат Крим како руска територија.

Изразувајќи незадоволство од руското притворање НА 24 украински војници во Керченскиот Теснец минатиот ноември, како и од сепаратистичките движења во Источна Украина, во петокот ЕУ, САД и Канада санкционираа уште осум руски официјални претставници.