Извештај: САД фрлија 6 бункер-бомби врз иранската нуклеарна постројка Фордо, лансираа 30 крстосувачки ракети врз Натанц

ВАШИНГТОН (АА) – Соединетите Американски Држави (САД) фрлија шест бункер-разбивачки бомби (бункер-бомби) врз нуклеарниот објект Фордо и извршија десетици напади со крстосувачки ракети од подморници врз две други локации, таргетирајќи ја нуклеарната програма на Иран, пренесува Анадолу.

„Фокс њуз“ соопшти дека Трамп детално му образложил за нападите на ТВ-водителот Шон Ханити, велејќи дека секоја од бомбите тежела 15 тони и била фрлена од американски бомбардери Б-2. Вкупно, 30 крстосувачки ракети Томахавк биле лансирани од американски подморници врз нуклеарните објекти во Натанц и Исфахан, додаде тој.

Трамп ги потврди нападите претходно синоќа и рече дека „полн авион“ бомби бил фрлен врз „примарната“ иранска нуклеарна локација во Фордо, а дополнителни напади биле извршени врз објектите во Натанц и Исфахан. Сите американски воени авиони го напуштиле иранскиот воздушен простор, рече тој.

„Сите авиони се безбедно на пат кон дома. Честитки до нашите големи американски воини. Нема друга војска во светот што може да го направи ова“, напиша Трамп на социјалните мрежи. „СЕГА Е ВРЕМЕ ЗА МИР! Ви благодарам за вниманието кон ова прашање.“

Нуклеарниот објект Фордо е подземен објект за збогатување на ураниум во близина на Ком - најдлабоката и најзајакнатата нуклеарна постројка на Иран дизајнирана да издржи конвенционални воздушни напади.

Иран претходно остро го предупреди Трамп против вмешување во конфликтот со Израел, нагласувајќи дека ако САД директно влезат во непријателствата, тоа ќе доведе до „непоправливи последици“.

Трамп постојано се закануваше дека ќе преземе воена акција против Техеран и тврдеше дека САД нема да дозволат Иран да се здобие со нуклеарно оружје, нешто што Иран постојано негираше дека се стреми да го стекне.

Непријателствата избувнаа на 13 јуни кога Израел започна воздушни напади врз неколку локации низ Иран, вклучувајќи воени и нуклеарни објекти, поттикнувајќи го Техеран да започне одмазднички напади.

Израелските власти соопштија дека најмалку 25 лица се загинати, а стотици се повредени оттогаш во иранските ракетни напади.

Во Иран, 430 лица се загинати, а над 3.500 се ранети во израелските напади, според иранското Министерство за здравство.