Израелската армија отвори оган врз цивилни подрачја во Дара, Јужна Сирија

Израелската армија отворила оган врз цивилни подрачја во село во Јужна Сирија, во провинцијата Дара, од подрачја што, исто така, ги окупира во јужниот дел на земјатa, пренесува Анадолу.

Според сириската државна телевизија Ал-Ихбарија, израелската армија отворила оган кон цивилни домови во неколку делови од селото Маарија.

Според наводите, пукањето принудило некои жители да ги напуштат своите домови.

Засега нема информации за загинати или повредени во инцидентот.

Јужна Сирија со месеци е сведок на постојани израелски упади и напади, вклучително и рации, претреси и апсења.

Израелските прекршувања се интензивираа по падот на режимот на Башар ал-Асад во декември 2024 година, кога Израел прогласи завршување на Договорот за раздвојување од 1974 година и презеде контрола врз тампон-зоната во Сирија.