Израелската Армија соопшти дека го почитува прекинот на огнот со Иран

Израелската Армија денес соопшти дека го почитува прекинот на огнот со Иран, но истовремено останува во состојба на висока готовност, јавува Анадолу.

„Во согласност со директивите на политичкото раководство, ИДФ (армијата) го почитува прекинот на огнот во кампањата против Иран и останува во состојба на висока готовност во одбраната, подготвена да одговори на какво било прекршување“, изјави портпаролот на Армијата во соопштение.

Армијата, сепак, соопшти дека нејзините воени операции во Либан сè уште траат и покрај паузата во борбите со Иран.

„ИДФ (армијата) продолжува со борбените и копнените операции против Хезболах“, се додава во соопштението.

Американскиот претседател Доналд Трамп синоќа објави дека се согласил „да ги прекине бомбардирањата и нападите врз Иран во период од две недели“.

Според „Тајмс оф Израел“, израелските воздухопловни сили немаат извршено никаков напад врз Иран од околу 3 часот по полноќ.

Регионалните тензии ескалираа откако САД и Израел започнаа заедничка офанзива врз Иран на 28 февруари, во која досега загинаа над 1.400 луѓе, меѓу кои и тогашниот врховен лидер ајатолахот Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив каде што има американски воени бази, предизвикувајќи жртви и штета на инфраструктурата и нарушувајќи ги глобалните пазари и авиосообраќајот.