Израелската армија: Уште еден војник загина во Појасот Газа

ИСТАНБУЛ (АА) - Уште еден израелски војник загина во судирите со палестинските борци на отпорот во Појасот Газа, соопшти денес израелската армија, пренесува Анадолу.

Шимон Јехошуа Асулин (24) од 924-от инженерски баталјон на Бригадата Харел на Јужната команда, загинал во судирите на југот на Појасот Газа, истакна во соопштение израелската армија.

Со тоа, бројот на загинати војници од 7 октомври се зголеми на 562, од кои 225 се загинати од почетокот на копнената операција на 27 октомври.

Израел започна смртоносна офанзива во Појасот Газа на 7 октомври во која досега загинаа најмалку 27.238 Палестинци, а повредени се 66.452 по ненадејниот напад на палестинската група на отпорот, Хамас. Се смета дека во нападот на Хамас загинати се речиси 1.200 Израелци.

Израелската офанзива остави 85 отсто од населението во Газа внатрешно раселено, сериозен недостиг на храна, чиста вода и лекови, и 60 отсто од инфраструктурата на енклавата оштетена или уништена, според Обединетите нации.

Јужноафриканската Република во декември поднесе тужба против Израел за геноцид пред Меѓународниот суд на правдата.

Судот на 26 јануари го утврди за веродостојно тврдењето на Јужноафриканската Република дека Израел врши геноцид. Тој издаде привремена наредба со која се бара од Израел да престане да ја попречува испораката на помош во Газа и да ја подобри хуманитарната ситуација.