Израелската војска на црната листа на ОН за тешки прекршувања над децата во вооружени судири

ЊУЈОРК (АА) - Обединетите нации (ОН) ги додадоа израелските вооружени и безбедносни сили на листата на „страни кои вршат тешки прекршувања над децата во ситуации на вооружен судир“, се наведува во извештајот.

Во извештајот за 2023 година, кој сѐ уште не е јавно објавен, а кој го виде Агенција Анадолу, пишува: „Во 2023 година насилството врз децата во вооружениот конфликт достигна екстремни нивоа, со шокантен пораст од 21 отсто тешки прекршувања на законот.“

Воочувајќи го порастот од 35 отсто на инцидентите кои доведоа до смрт и ранувања на деца во споредба со претходната година, во извештајот се наведува дека „Обединетите нации потврдија 32.990 тешки прекршоци, од кои 30.705 извршени во 2023 година, а 2.285 извршени порано, но потврдени во 2023 година“.

Според извештајот, во 2023 година биле убиени 5.301 дете, 6.348 деца биле ранети, 8.655 деца биле регрутирани во вооружени групи, 5.205 деца биле ускратени за хуманитарна помош, 2.491 дете биле приведени поради поврзаност со вооружени групи, а 4.356 деца се киднапирани.

- За прв пат се споменуваат израелските сили -

Според извештајот, во светло на неодамнешните случувања во Газа, тешките прекршувања над децата во Израел и на окупираните палестински територии се зголемени за 155 отсто.

Во тој контекст, евидентирани се најмалку 8.009 случаи на тешки прекршоци. Овие прекршувања погодиле 4.360 деца, од кои 113 израелски и 4.247 палестински.

Во извештајот се наведува дека биле извршени 7.837 прекршувања над 4.247 палестински деца во Газа, окупираниот Западен Брег и Источен Ал-Кудс/Ерусалим. Се напоменува дека овие прекршувања биле извршени од израелската војска и израелските илегални доселеници.

Понатаму се наведува дека израелската војска и безбедносните сили се одговорни за 5.698 од овие прекршувања.

Наведувајќи дека Израел притворил 906 палестински деца, извештајот, исто така, укажува на тоа дека ОН имаат информации за деца кои биле изложени на малтретирање и сексуално злоупотребување.

Во извештајот се наведува и дека израелската војска го попречувала пристапот на децата до хуманитарна помош во Газа, окупираниот Западен Брег и Источен Ал Кудс.

Освен израелската војска и безбедносните сили, на листата се најдоа и вооруженото крило на Хамас, Бригадите Касам и Ал Кудс, вооруженото крило на палестинската група Исламски џихад.

Во извештајот се наведува дека 23.000 тешки прекршувања чекаат потврда поради ситуацијата во Газа во последниот квартал од 2023 година.

„Шокиран сум од невидениот број на деца убиени и осакатени од страна на израелската војска и безбедносните сили во Појасот Газа и окупираниот Западен Брег, вклучувајќи го и Источен Ерусалим“, изјави генералниот секретар на ОН, Антонио Гутереш.

- Главни области на прекршување -

Во извештајот се наведува дека Израел, окупираните палестински територии, Демократска Република Конго, Мјанмар, Сомалија, Нигерија и Судан се местата каде што прекршувањата врз децата се најинтензивни.

Во Демократска Република Конго пријавени се 3.764 тешки прекршувања, 2.799 во Мјанмар, 2.283 во Сомалија, 1.995 во Нигерија и 1.721 во Судан.

Во извештајот, исто така, се наведува дека руските безбедносни сили и понатаму се на листата за прекршувања во Украина, со 938 регистрирани случаи на тешки прекршувања.

Во извештајот понатаму се споменува дека машките деца се регрутираат, убиваат и рануваат, додека женските деца почесто се изложени на сексуално насилство.