Израелските сили приведоа Сириец за време на упад во северниот дел на Кунејтра

Израелските сили денес приведоа млад Сириец за време на упад во северните рурални предели на Кунејтра, во југозападна Сирија, јавуваат локалните медиуми, пренесува Анадолу.

Телевизијата „Ал-Ихбарија“ објави дека израелските сили извршиле упад во селото Ал-Хурија и привеле машко лице, без да дадат дополнителни детали за неговиот идентитет или за околностите на апсењето.

Во друг упад, израелска воена патрола напредувала кон селото Зубаида во областа Кунејтра во моментот кога учениците се упатувале кон своите училишта, пренесе телевизијата.

Присуството на израелската војска предизвикало страв и вознемиреност кај учениците во таа област, додаде „Ал-Ихбарија“.

Засега нема коментар од израелската војска во врска со овие упади.

Според истиот извор, најновите упади се случуваат по еден ден откако израелските сили извршија претрес во неколку домови во селото Маарија, западно од Дараа, и поставија контролен пункт на патот Аин ал-Нурија – Кан Арнаба во Кунејтра.

Упадот се случува во услови на ескалација на израелските упади на сириска територија, прашање за кое претседателот Ахмед ал-Шара зборуваше минатата недела во својот говор на 81-то заседание на Генералното собрание на ОН.

Ал-Шара изјави дека Израел извршил околу 500 воздушни и артилериски напади, повеќе од 1.200 упади и околу 300 апсења и притворања од крајот на 2024 година.

Тој ги отфрли обидите за наметнување на состојба на свршен чин, ја потврди посветеноста на Сирија кон Договорот за недејствување на силите од 1974 година и повика на повлекување на израелските сили на позициите што ги држеле пред 8 декември 2024 година.