Илјадници граѓани на Јордан на собир за поддршка на Газа: Народот не сака нормализација на односите со Израел

АМАН (АА) - Илјадници луѓе во Јордан протестираа против израелските напади врз Појасот Газа и упатија поддршка на палестинскиот отпор, јавува Анадолу.

Протестот беше организиран од Националниот форум за поддршка на палестинскиот отпор.

Бројните граѓани протестниот марш го одржаа од џамијата Ал-Хусајни во главниот град Аман сè до плоштадот Ан-Нахил.

Граѓаните извикуваа пароли „Народот не сака нормализација на односите со Израел“ и „Не за ционистичката амбасада во Јордан“.

Израел ја крши резолуцијата на Советот за безбедност на Обединетите нации со која се бара итен прекин на огнот и продолжува со нападите врз Појасот Газа, во кои од 7 октомври минатата година убиени се повеќе од 38.800 Палестинци, а над 89.400 се ранети.

Израел е обвинет за геноцид од страна на Меѓународниот суд на правдата, чија последна пресуда му наложи веднаш да ја прекине воената операција во јужниот град Рафа, каде што повеќе од милион Палестинци побараа засолниште од војната пред да започне копнената офанзива врз градот на 6 мај.