Индонезискиот вулкан Семеру еруптираше трипати, исфрлајќи пепел во висина од 1.000 метри

Индонезискиот вулкан Семеру еруптираше три пати рано утринава, исфрлајќи вулканска пепел на височина до 1.000 метри над својот врв, соопшти државната агенција за управување со катастрофи, јавува Анадолу.

Вулканот се наоѓа на границата меѓу областите Лумаџанг и Маланг во провинцијата Источна Јава.

Облаците од пепел достигнаа височина од приближно 500, 800 и 1.000 метри над врвот, изјави за Анадолу, Бертон Панџаитан, портпарол на Националната агенција за ублажување на последиците од катастрофи на Индонезија.

Семеру, највисоката планина на островот Јава со надморска височина од 3.676 метри, останува на ниво III – втората највисока категорија во индонезискиот систем за предупредување за вулканска активност, кој се состои од четири нивоа.

Тој моментално е еден од петте вулкани во Индонезија кои се на ниво III, додека властите продолжуваат да ја следат вулканската активност.

Планината Семеру се наоѓа во Источна Јава, во западниот дел на индонезискиот архипелаг.

Индонезија, земја составена од повеќе од 17.000 острови, се наоѓа покрај сеизмички активниот пацифички „Огнен прстен“ и е место на повеќе од 120 активни вулкани.

Семеру е еден од најактивните вулкани во земјата и во последните години имаше чести ерупции.