Кинескиот претставник за Украина се сретна со Зеленски

ИСТАНБУЛ (АА) - Кинескиот претставник за евроазиски прашања Ли Хуи се состана со украинскиот претседател Владимир Зеленски, објави Пекинг денес, пренесува Анадолу.

„Двете страни разменија мислења за политичкото решение на украинската криза и кинеско-украинските односи“, се вели во соопштението на кинеското Министерство за надворешни работи.

Ли, кој минатиот месец беше избран од кинескиот претседател Си Ѓинпинг за специјален претставник за Украина, до вчера престојуваше во дводневна посета на Киев.

Во соопштението се вели дека Ли се состанал и со други украински официјални претставници, меѓу кои и со министерот за надворешни работи Дмитро Кулеба.

Тој разговараше и со претставници на украинските министерства за инфраструктура, енергетика и одбрана.

Осврнувајќи се на „ставот на Кина за политичко решение на украинската криза“, Ли рече дека „не постои подготовка за решавање на кризата“.

„Сите страни треба да почнат од себе, да акумулираат меѓусебна доверба и да создадат услови за ставање крај на војната и мировни преговори“, им рече Ли на украинските претставници, се наведува во соопштението.

Се додава дека Кина е подготвена да ја охрабри меѓународната заедница да го формира најголемиот заеднички именител „за решавање на кризата во Украина и да вложи свои напори да ја запре војната, да го прекине огнот и да го врати мирот што е можно поскоро“.

Украинската страна „ја поздрави одлуката на Кина да игра активна улога во завршувањето на војната и враќањето на мирот“, се вели во соопштението.

Назначувањето на Ли за специјален претставник за Украина дојде откако Си го одржа својот прв телефонски разговор со Зеленски минатиот месец од почетокот на војната во февруари 2022 година.

Покрај Украина, Ли ќе ги посети и Полска, Франција, Германија и Русија со цел да се најде решение за украинската криза.