Лавров: Русија ќе ги затвори претставништвата на „Гете-институт“ како одговор на потегот на Германија

Русија ќе ги затвори претставништвата на „Гете-институт“ во Москва, Санкт Петербург и Екатеринбург како одговор на одлуката на Германија да го затвори Рускиот дом за наука и култура во Берлин, изјави денес министерот за надворешни работи Сергеј Лавров, јавува Анадолу.

Говорејќи на предавањето организирано од друштвото „Знание“ на маргините на Источниот економски форум во Владивосток, Лавров го отфрли учеството на Русија во инцидентот со беспилотно летало на аеродромот во Лајпциг, Германија, на почетокот на август.

Тој рече дека германските власти ја засновале својата одлука врз претпоставка дека беспилотното летало наликувало на оние што ги користи Русија.

„Претставништва на 'Гете-институт' има во Москва, Санкт Петербург и Екатеринбург. Секако, тие ќе бидат затворени откако нашиот културен центар беше протеран од таму“, рече Лавров.

„Во спротивно, не би се почитувале себеси“, додаде тој.

Германската Влада на 1 септември објави дека ќе го раскине договорот со кој се регулираат активностите на Рускиот дом за наука и култура во Берлин по инцидентот со дрон на аеродромот во Лајпциг.

Германија ѝ ја припиша одговорноста за инцидентот со дронот на Русија.

Руската амбасада во Берлин го отфрли обвинението, опишувајќи го инцидентот како провокација и оценувајќи дека мерките на Германија претставуваат сериозна ескалација на билатералните односи.