Lina Altawell
17 Август 2026•Ажурирано: 17 Август 2026
Либанскиот претседател Џозеф Аун денес повика на продолжување на мандатот на Привремените сили на ОН во Либан (УНИФИЛ), истакнувајќи дека нивното присуство придонесува за стабилноста во јужниот дел на земјата, јавува Анадолу.
„Присуството на УНИФИЛ на југот е важно од многу аспекти, помага жителите да останат во своите села и градови и ја зајакнува стабилноста во соработка и координација со либанската Армија“, изјави Аун за време на средбата со парламентарна делегација, се наведува во соопштението од Претседателството.
„Нашата прва опција е продолжување на мандатот на УНИФИЛ“, рече тој.
„Доколку неговиот мандат не биде продолжен, втората опција е усвојување формула која ќе обезбеди продолжување на присуството на меѓународните сили на југот, во рамките на потребната правна рамка.“
Аун истакна дека овие сили ќе помогнат во поддршката на стабилноста, во соработка со либанската Армија.
Либанскиот претседател рече дека Израел се противи на присуството на УНИФИЛ и „речиси една година врши притисок во таа насока“.
„Во меѓувреме, Либан продолжува да бара УНИФИЛ да остане“, додаде тој.
„Основната идеја е да се постигне напредок што ќе обезбеди продолжување на меѓународното присуство на југот, без разлика дали преку продолжување на мандатот на УНИФИЛ или преку меѓународни сили кои ќе го поддржуваат, на начин што ќе ја зачува стабилноста и ќе ја зајакне улогата на државата и либанската Армија“, рече тој.
Привремените сили на ОН во Либан се распоредени од 1978 година со цел да го следат прекинот на огнот покрај либанско-израелската граница и да ги поддржуваат Либанските вооружени сили во јужен Либан. Мандатот на УНИФИЛ истекува на 31 декември 2026 година.
Ова се случува во услови на тензии покрај либанско-израелската граница, откако Израел започна смртоносни напади врз Либан, при што од 2 март загинаа повеќе од 4.300 лица, над 12.300 беа повредени, а повеќе од еден милион беа раселени, според официјалните либански податоци.
