Либија: Претставникот на ОН и Хафтар се согласија за потребата од финализирање на нацрт-изборните закони

ТРИПОЛИ (АА) - Претставникот на Обединетите нации (ОН) во Либија, Абдулаје Батили, во понеделникот се сретна со лидерот на силите од истокот на Либија, Калифа Хафтар, за да ги подготви неопходните услови за избори во таа земја, пренесува Анадолу.

„Се сретнав со Калифа Хафтар во Бенгази. Се договоривме дека е неопходно да се финализираат нацрт-изборните закони и да се обезбедат поволни услови за национални избори во Либија“, рече Батили на социјалната мрежа Х, споделувајќи фотографии од средбата.

За време на средбата се разговараше и за последните политички случувања во земјата, се наведува во соопштението на силите на Хафтар.

Батили во недела се состана со претседателот на Високата национална изборна комисија на Либија, Емад ал-Сајех, и со лидерот на Врховниот државен совет на Либија, Мохамед Такал.

Либија, која е богата со нафта, е средиште на длабока политичка и безбедносна криза и немири од 2011 година, кога долгогодишниот владетел Моамер Гадафи беше соборен и убиен по четири децении на власт.