Merve Berker
04 Декември 2025•Ажурирај: 08 Декември 2025
АНКАРА (АА) – Мета започна да ги брише профилите на австралиските корисници под 16-годишна возраст на Инстаграм, Фејсбук и Tредс само неколку дена пред стапувањето на сила на новиот закон за социјални мрежи, јавија вчера австралиските медиуми, јавува Анадолу.
Уште од 4 декември компанијата почна да ги деактивира профилите на корисници на возраст од 13 до 15 години, во пресрет на она што се смета за прва национална забрана за малолетници на социјални мрежи во светот, според Би-би-си.
Законот бара платформите да преземат „разумни чекори“ за да спречат лица под 16 години да имаат профили.
Неспроведувањето на обврските може да резултира со парични казни до 49,5 милиони австралиски долари (33 милиони американски долари).
Според Мета, мерката ќе погоди околу 150.000 корисници на Фејсбук и околу 350.000 профили на Инстаграм во Австралија. Бидејќи Тредс функционира преку Инстаграм, автоматски ќе бидат опфатени и тие профили.
Би-би-си објави и изјава од портпаролот на Мета, кој истакнал дека „усогласувањето со законот ќе биде постојан и повеќеслоен процес“, додавајќи дека компанијата поддржува „поефикасен, стандардизиран и пристап што ја задржува приватноста“.
Мета предложи Владата да воведе проверка за возраста преку продавниците за апликации, каде што би се вршела проверка при преземање и би се барала родителска согласност за корисници под 16 години наместо товарот да паѓа врз платформите.
Корисниците што биле означени како малолетни ќе може да ги симнат и зачуваат своите податоци пред трајно да бидат избришани профилите.
Тие што сметаат дека биле погрешно идентификувани ќе може да побараат ревизија преку праќање видеоселфи или документ за идентификација.
Министерката за комуникации на Австралија, Аника Велс, изјави дека целта на законот е да ја заштити „Генерација Алфа“ од штетни содржини на интернет, напоменувајќи дека се очекуваат „почетни проблеми“.
Забраната се однесува и на други големи платформи, меѓу кои Јутјуб, ТикТок, Снепчет, Рефит, американската платформа X, како и Кик и Твич. Велс додаде дека внимателно ги следи и апликациите Лемон 8 и Јоуп поради потенцијално префрлање на младите корисници кон нив.
Лемон 8 веќе најави дека ќе ги исклучи сите корисници под 16 години, а Јоуп тврди дека функционира како приватен месинџер и не спаѓа во дефиницијата за социјална мрежа.
Австралискиот потег го следат и други земји, во време кога расте глобалната загриженост за изложеноста на децата на штетни онлајн содржини.
Студијата финансирана од австралиската Влада оваа година покажа дека 96% од децата на возраст од 10 до 15 години користат социјални мрежи, а многу од нив биле изложени на вознемирувачки материјал.
