Министерство за здравство на Газа: 350.000 хронични пациенти останаа без лекови

ГАЗА (АА) - Околу 350.000 хронични пациенти останаа без лекови во Појасот Газа, каде што Израел продолжува со интензивните напади, јавува Анадолу.

Предупредувајќи за опасните здравствени компликации на кои се изложени овие пациенти, Ашраф ал Кудра, портпаролот на палестинското Министерство за здравство во Газа, ги повика меѓународните институции „веднаш да обезбедат лекови за хроничните пациенти“.

Тој рече дека азотниот гас што се користи во операционите сали истекол и има сериозен недостиг на други медицински гасови.

„350.000 хронично болни пациенти во Појасот Газа останаа без лекови“, нагласи Ал Кудра.

Палестинските и меѓународните здравствени институции постојано предупредуваат дека здравствениот сектор во Појасот Газа ќе пропадне како резултат на израелските напади што траат од 7 октомври.