ХУЗЕСТАН (AA) – Меѓународно значајното мочуриште Шадеган во југозападната иранска покраина Хузестан се соочува со сериозна закана од пресушување, поради екстремно високите температури, малите врнежи, климатските промени и несоодветното управување со водните ресурси, јавува Анадолу.
На терен, локалното население сѐ уште се обидува да го одржи секојдневниот живот, користејќи чамци за движење низ преостанатите водни површини, иако голем дел од мочуриштето веќе е исушен.
Шадеган важи за едно од најзначајните мочуришни подрачја во Иран, со клучна улога за биодиверзитетот, локалната економија и животната средина.
Според иранската новинска агенција ИРНА, околу 58 проценти од мочуриштето веќе се исушени, што предизвикува загриженост кај експертите и еколошките организации.
Тие предупредуваат дека состојбата во Шадеган е дел од поширок проблем, наведувајќи дека приближно 60 проценти од мочуриштата низ Иран се соочуваат со сличен ризик.
Стручњаците посочуваат дека долготрајната суша, зголемените температури и климатските промени, во комбинација со слабата контрола и управување со водите, значително го забрзуваат процесот на деградација на овие чувствителни екосистеми.
