Националното Собрание на Франција со предлог-закон за забрана на социјалните мрежи за деца под 15 години

ЖЕНЕВА (АА) – Француските законодавци одобрија предлог-закон со кој се забрануваат социјалните медиуми за деца под 15 години, потег предводен од претседателот Емануел Макрон како метод за заштита на помладите, јавува Анадолу.

Предлог-законот е усвоен од Долниот дом на Парламентот, Националното Собрание, со 130 гласови „за“ наспрема 21 „против“ по синоќешната долга седница.

Како следен чекор, предлог-законот ќе биде испратен до Сенатот за понатамошно разгледување пред да се усвои како закон.

Претседателот Макрон го поздрави усвојувањето на предлог-законот преку американската компанија за социјални мрежи Х, нарекувајќи го потегот огромен чекор напред кон заштитата на децата и тинејџерите во Франција.

Додаде дека очекувањата од Сенатот се позитивни за продолжување на „конструктивната работа” за овој закон да биде ефективен со почетокот на следната училишна година.

„Бидејќи умот на нашите деца не е на продажба. Ниту на американските платформи, ниту пак, на кинеските мрежи”, изјави Макрон.

„Нивните соништа не смеат да бидат диктирани според алгоритми. Бидејќи не сакаме вознемирени и анксиозни поколенија, туку млади генерации кои веруваат во Франција, во Републиката и нејзините вредности.”

Францускиот претседател Макрон потврди дека со првиот чекор, децата и тинејџерите на Франција ќе бидат „конечно заштитени“.