Нетанјаху порача дека Хусите „скапо ќе платат“ поради ракетниот напад врз Израел

КУДС (ЕРУСАЛИМ) (АА) - Израелскиот премиер Бенјамин Нетанјаху денес вети дека јеменските Хуси „скапо ќе платат“ по ракетниот напад во кој беа повредени девет лица во Тел Авив, јавува Анадолу.

„Утринава Хусите лансираа ракета земја-земја од Јемен на наша територија. Тие досега требаше да знаат дека секој обид да ни се наштети скапо ќе се плати“, рече Нетанјаху на почетокот на состанокот на Владата, соопшти неговиот Кабинет.

„Оние на кои им е потребно потсетување во врска со ова прашање се поканети да го посетат пристаништето Ал Худајда“, додаде тој, мислејќи на западниот јеменски град што израелските воени авиони го бомбардираа во јули, откако во напад на Хусите со дрон загина еден Израелец во Тел Авив.

Ракетата на Хусите падна на отворен простор во близина на аеродромот Бен Гурион во Тел Авив утрово и покрај обидите на Израел за нејзино пресретнување.

Според израелската војска и локалните медиуми, девет Израелци биле повредени додека брзале кон засолништата, а пожари избувнале во шумските подрачја поради паѓање на остатоци од ракетата. За време на инцидентот, пожар избувнал и во голема фабрика за цемент.

Јеменските бунтовниците Хуси ги напаѓаат бродовите што се во израелска сопственост, кои се означени, управувани или пловат кон израелските пристаништа во Црвеното Море и Аденскиот Залив со проектили и дронови во знак на солидарност со Газа, која е под разорен израелски напад од 7 октомври.