Оман го поздрави двонеделниот прекин на огнот меѓу Иран и САД

Оман денес ја поздрави одлуката за двонеделен прекин на огнот меѓу Соединетите Американски Држави (САД) и Иран, повикувајќи на интензивирање на напорите за постигнување трајно решение на конфликтот, јавува Анадолу.

Во соопштението објавено денес Министерството за надворешни работи на Оман изрази благодарност за посредничките напори, особено оние предводени од Пакистан, како и за сите други страни што работат на ставање крај на војната.

Министерството ја нагласи важноста да се искористи овој прекин на огнот за решавање на „корените на кризата“ и за обезбедување траен прекин на непријателствата во регионот.

Синоќа Трамп објави дека се согласил „да ги прекине бомбардирањата и нападите врз Иран во период од две недели“.

Регионалните тензии ескалираа откако САД и Израел започнаа заедничка офанзива врз Иран на 28 февруари, во која досега загинаа над 1.400 луѓе, меѓу кои и тогашниот врховен лидер ајатолахот Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив каде што има американски воени бази, предизвикувајќи жртви и штета на инфраструктурата и нарушувајќи ги глобалните пазари и авиосообраќајот.