Палестинските деца се најпогодени од продлабочувањето на хуманитарната криза во Газа

ГАЗА (АА) - Кризата со храна дополнително се продлабочува во Газа поради геноцидот врз Палестинците и тековната блокада од страна на Израел, кој ги затвори граничните премини, со што не се дозволува влез на хуманитарна помош, јавува Анадолу.

Тековната израелска агресија ја влоши хуманитарната ситуација во Појасот Газа, оставајќи многу луѓе без пристап до основните ресурси, вклучително и потребата од вода и храна, што најмногу ги погоди палестинските деца.

Недостигот на храна се забележува насекаде низ палестинската енклава, а неколку добротворни организации вложуваат напори да дистрибуираат храна за Палестинците во загрозените подрачја, разорени од израелските брутални напади. Децата во долги редици чекаат за да добијат храна.

- Обновување на израелските напади врз Газа

На 18 март израелската Армија започна ненадејна воздушна кампања врз Појасот Газа. Оттогаш се убиени 1.249 Палестинци, а речиси 3.022 се повредени и покрај договорот за прекин на огнот и размена на затвореници што беше постигнат во јануари.

Од почетокот на израелската офанзива во октомври 2023 година досега во Газа се убиени над 50.800 Палестинци, повеќето жени и деца, а повеќе од 115.700 се повредени.

Во ноември минатата година, Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана, Јоав Галант, за воени злосторства и злосторства против човештвото во Газа.

Израел е обвинет за геноцид пред Меѓународниот суд на правдата за неговите постапки во енклавата.