По земјотресот во Тибет се раселени илјадници луѓе, а најмалку 126 загинаа

ИСТАНБУЛ (АА) - Повеќе од 46.000 луѓе се раселени по силниот земјотрес со јачина од 6,8 степени според Рихтеровата скала што го погоди градот Ксигазе во јужниот кинески регион Тибет, објавија денес државните медиуми, јавува Анадолу.

Земјотресот го погоди Ксигазе во автономниот регион Ксизанг, локалното име на Тибет, во 9:05 часот по локално време (0105 GMT) вчера, на длабочина од 10 километри.

Најмалку 126 луѓе загинаа во земјотресот, додека 407 затрупани се спасени живи.

Околу 14.000 лица од персоналот за пребарување и спасување со помош од војниците на Народноослободителната армија, кои распоредија хеликоптери и беспилотни летала, исто така, продолжија со својата работа денес за да бараат преживеани.

Властите поставија 187 локации за преселување со 3.705 шатори, обезбедувајќи засолништа за 46.525 лица, објави дневниот весник „Глобал тајмс“.

Најмалку 3.609 куќи се срушени, соопшти градската управа на Ксигазе.

Епицентарот на земјотресот бил во населеното место Цого во округот Дингри, кое има 27 села и околу 6.900 луѓе во радиус од 20 километри од епицентарот.