Потпретседателот на Европската централна банка: Војната во Иран би можела да го продолжи енергетскиот шок до 2027 година

ОВИЕДО (АА) – Потпретседателот на Европската централна банка, Луис де Гиндос, предупреди дека ескалацијата на конфликтот со Иран би можела да предизвика долготраен шок на цените на енергенсите, што дополнително ќе го попречи економскиот раст и ќе ја поттикне инфлацијата низ еврозоната, пренесува Анадолу.

Во интервјуто објавено денес од шпанскиот дневен весник „Ел Мундо“, Де Гиндос изјави дека силата на економскиот удар ќе зависи од времетраењето на конфликтот и колку далеку тој ќе се прошири.

„Ударот ќе биде интензивен и врз развојот и врз инфлацијата”, изјави тој, опишувајќи го Блискиот Исток како извор на огромна неизвесност.

Според основното сценарио на ЕЦБ, цените на енергенсите би го достигнале својот врв во вториот квартал на 2026 година, пред брзо да опаднат. Сепак, Банката разгледува и понеповолни сценарија кои би можеле да ги задржат цените на нафтата и гасот на високо ниво до крајот на 2026 година или и понатаму.

„Во најлошото сценарио, ситуацијата би била многу потешка и би почнала бавно да се нормализира дури на почетокот на следната година“, истакна тој.

Покрај ризиците, Де Гиндос вели дека ЕЦБ моментално не предвидува рецесија во еврозоната, дури и при понеповолни сценарија, иако предупреди дека проекциите остануваат неизвесни.

Тој изјави дека Централната банка ќе ги почека податоците пред да одлучи дали да ги зголеми каматните стапки.

- Автономија во платниот систем на ЕУ -

Покрај моменталната криза, тој ја повика Европа да ја намали својата зависност од надворешните сили, особено од Соединетите Американски Држави, вклучително и во финансиската инфраструктура.

Тој ја истакна важноста од забрзување на воведувањето на дигиталното евро, тврдејќи дека тоа ќе ја зајакне стратегиската автономија на Европа во платниот промет, со кој моментално доминираат американски компании.

„Дигиталното евро би било вид дигитална валута за цела Европа, достапно на нашите мобилни телефони“, изјави тој, додавајќи дека тоа нема да ги исклучи готовината или другите опции за плаќање.

- Имиграцијата го поттикнува шпанскиот развој -

Осврнувајќи се на Шпанија, каде што беше министер за економија во конзервативната влада на Маријано Рахој, тој истакна дека економијата покажала силен раст во последните години, во голема мера поттикнат од имиграцијата, која тој ја опиша како „суштинска”.

Според процените на ЕЦБ, порастот на населението поврзан со имиграцијата е заслужен за повеќе од половина од неодамнешната експанзија на шпанскиот БДП, кој расте двојно побрзо од просекот на Европската Унија.

Сепак, тој предупреди дека брзиот раст на населението создава притисок врз домувањето и јавните услуги.

Исто така, додаде дека шпанскиот финансиски систем е поздрав отколку за време на претходните кризи.

Осумгодишниот мандат на Де Гиндос како потпретседател на ЕЦБ завршува во мај. Него ќе го наследи хрватскиот економист Борис Вујчиќ.