Првиот ден од Самитот на Г-7 обележан со значајни случувања поврзани со глобалните прашања

ЛОНДОН (АА) - Првиот ден од Самитот на лидерите на групата Г-7, чиј домаќин е Италија, беше заокружен вчера со значајни случувања во врска со различни глобални прашања, јавува Анадолу.

Клучните дискусии за време на Самитот, кој ќе трае до утре (сабота), се фокусирани на глобалните конфликти, растот на вештачката интелигенција и прашањата за Африка, со посебен фокус на тековната загриженост на Италија за неконтролираната миграција од континентот кон Европа.

На агендата ќе бидат и други теми, како што се климатските промени и Кина.

Првиот ден Соединетите Американски Држави (САД) и Украина потпишаа клучен 10-годишен билатерален договор за безбедност.

Склучувањето на договорот, кој Киев го смета за клучен чекор кон членство во НАТО, беше означен од украинскиот претседател Владимир Зеленски како „историски ден“.

Тој изрази благодарност до американскиот претседател Џо Бајден и американскиот народ за нивната цврста поддршка во периодот на војна на неговата земја со Русија.

На заедничката прес-конференција Бајден рече дека договорот ќе ги зајакне силата, одржливоста и издржливоста на Украина.

Тој се осврна и на конфликтот со Русија: „Путин не може да нѐ подели.“

Како дополнително зајакнување на меѓународната поддршка на Украина, со Јапонија беше потпишан билатерален безбедносен договор.

Договорот ѝ обезбедува на Украина помош од 4,5 милијарди долари оваа година и континуирана поддршка во следните десет години.

Зеленски го пофали договорот, истакнувајќи ја Јапонија како една од економски и технолошки најнапредните земји во светот и изрази благодарност за нејзината непоколеблива поддршка.

Претседателката на Европската комисија, Урсула фон дер Лајен, го пофали новиот договор за гарантирање заем од 50 милијарди долари за Украина.

Заемот ќе биде финансиран со добивката од замрзнатите средства на Руската централна банка што се чуваат во Европа.

Велика Британија, САД и Канада, пак, заеднички ја обвинија Русија за заговор за мешање во претстојните претседателски избори во Молдавија и референдумот за членство во Европската Унија.

Во остра изјава трите земји ги обвинија руските актери за „ширење лаги“ и „поткопување на молдавските демократски институции“.

Г-7 е неформален форум што одржува годишен самит на кој се разговара за прашања од економската политика и безбедноста. Членки се Канада, Франција, Германија, Италија, Јапонија, Велика Британија и САД.