Mustafa Deveci
16 Октомври 2025•Ажурирај: 17 Октомври 2025
АНКАРА (АА) - И покрај договорот за прекин на огнот, продолжува неизвесноста во врска со датумот на повторно отворање на граничниот премин Рафа, единствената порта на Појасот Газа кон надворешниот свет, освен Израел, известува Анадолу.
Единицата за координација на владините активности на палестинските територии (COGAT), која е дел од израелската Армија, издаде писмено соопштение во врска со моменталната состојба на граничниот премин Рафа.
Граничниот премин Рафа, кој требаше да се отвори во средата, останува затворен поради „логистички причини“.
Во соопштението се наведува дека „со целосна координација“ продолжуваат подготовките за отворање на граничниот премин Рафа за човечки премин меѓу Израел и Египет.
Се истакнува дека датумот кога преминот Рафа ќе биде отворен за поминување на луѓе ќе биде објавен дури откако ќе бидат завршени потребните подготовки.
Се додава дека хуманитарната помош за Газа ќе влезе преку граничниот премин Керем Абу Салим (Керем Шалом) на границата на Израел со Египет по извршена „безбедносна проверка“, а возилата за хуманитарна помош нема да поминуваат низ Рафа.
Во соопштението не се дадени информации за тоа кога ќе бидат завршени подготовките за граничниот премин Рафа.
Според договорот за прекин на огнот постигнат меѓу Израел и Хамас, Израел е должен да дозволи 600 камиони со хуманитарна помош да влезат во Газа секој ден.
Сепак, палестински извори посочуваат дека бројот на камиони со помош што влегуваат во Газа е далеку под оваа бројка.
