Путин: Доколку Трамп беше реизбран во 2020 година можеби немаше да дојде до украинската криза

МОСКВА (АА) - Доколку Доналд Трамп беше реизбран за претседател на Соединетите Американски Држави (САД) во 2020 година, можеби немаше да се случи украинската криза што избувна во 2022 година, изјави рускиот претседател Владимир Путин, пренесува Анадолу.

Во интервју за рускиот ТВ канал „Россија 1“ Путин истакна дека Русија останува отворена за мировни преговори за војната во Украина.

Тој рече дека Москва никогаш не одбила контакт со американската администрација, но претходната администрација одлучила да нема таков ангажман.

За неговиот однос со Трамп, Путин рече дека е „строго деловен, но сепак прагматичен и заснован на доверба“, и додаде: „Не можам, а да не се согласам со него дека ако тој беше претседател, ако не му беше украдена победата во 2020 година, тогаш можеби немаше да избувне украинската криза во 2022 година“.

Тој нагласи дека Трамп во претходниот мандат вовел значителен број санкции кон Русија.

„Не мислам дека таа одлука беше во најдобар интерес на Русија или на САД. Патем, (Џо) Бајден ја зеде палката и ни наметна уште повеќе ограничувања. Сите сме свесни за резултатите - многу тие одлуки беа штетни за економијата на САД“, рече Путин.

Состојбата на доларот како глобална валута ослабе по одлуката на Вашингтон да ја спречи Русија да го користи како платежна валута, рече Путин.

„Не одбивме да го користиме американскиот долар. Претходната администрација нѐ спречи да го користиме како платежна единица. Но, сега нема да навлегувам во тоа. Сè што можам да кажам е дека го слушаме актуелниот претседател како вели дека е подготвен да работиме заедно, остануваме отворени за тоа“, нагласи рускиот претседател.

За Украина, Путин рече дека Русија постојано демонстрирала подготвеност за дијалог, но дека одредени препреки остануваат.

„На пример, добро е познато дека уште кога беше прилично легитимен шеф на државата, сегашниот лидер на режимот во Киев издаде извршна наредба за забрана на преговорите. Како може да се продолжат преговорите сега кога тие се отфрлени како незаконски? праша тој.

„Се чини дека сегашниот режим во Киев е сосема задоволен што добива стотици милијарди од своите добродетели и, извинете што користам ваква фраза, ги собира тие пари како да нема утре“, додаде Путин.

Рускиот претседател ги повика финансиските поддржувачи на Украина да извршат притисок врз украинскиот претседател Владимир Зеленски да дејствува. „Верувам дека нема да има друг избор освен да послуша.“

„Додека оваа извршна наредба не се укине, прилично е тешко да се зборува за почеток, а камоли за завршување на овие преговори на соодветен начин. Навистина, може да се наведат прелиминарни планови, но вклучувањето во сериозни преговори останува особено тежок предлог, особено со оглед на забраната од украинска страна“, рече тој.

И покрај овие предизвици, Путин изрази надеж за конструктивен ангажман меѓу Русија и САД за неколку заеднички загрижености, меѓу кои и стратешката стабилност, економските прашања и производството на енергија.

„Ние не сме само меѓу најголемите производители на енергија, ние сме и меѓу најголемите потрошувачи на енергија, што значи дека превисоките цени се лоши за двете наши економии, бидејќи енергијата се користи за производство на други стоки во земјата. Премногу ниските цени пак се исто така лоши затоа што тие го поткопуваат инвестицискиот потенцијал на енергетските компании.

Путин изрази и скептицизам за заканите на Трамп за дополнителни санкции кон Русија, сомневајќи се дека Трамп ќе преземе мерки штетни за американската економија. Имаме работи за кои треба да разговараме. Има и други прашања во енергетскиот сектор кои можат да бидат од заеднички интерес“, истакна Путин.

„За нас има смисла да се сретнеме врз основа на денешните состојби, да седнеме и да разговараме без брзање за областите што се од интерес за САД и за Русија. Ние сме подготвени да го направиме тоа. Но, повторно, ова, пред сè зависи од одлуките и изборите на актуелната американска администрација“, заклучи тој.