Русија го заврши повлекувањето на своите војници од јужниот украински град Херсон

МОСКВА (АА) - Повлекувањето на руската војска од јужниот град Херсон кон источниот брег на реката Днепар е завршено, соопшти руското Министерство за одбрана, пренесува Агенција Анадолија (АА).

„Ниту една единица на воена опрема и оружје не е оставена на западниот брег. Сите руски војници преминаа на левиот брег на Днепар“, се вели во соопштението.

„Руските единици зазедоа одбранбени позиции, подготвени однапред“, додаде Министерството и истакна дека повлекувањето е спроведено без загуби.

„На сите цивили кои сакаа да го напуштат западниот брег од регионот Херсон, им беше помогнато во евакуацијата“, посочи руското Министерство.

Минатиот месец, околу 115.000 жители на јужниот украински регион Херсон, тогаш под руска контрола, беа евакуирани поради украинската контраофанзива.

Сергеј Суровикин, командантот на руската воена единица во Украина, рече дека војската останала за да осигура безбедна евакуација на цивилите, а сега, со завршената задача, тие можат да се повлечат.

Во врска со повлекувањето, турскиот претседател Реџеп Таип Ердоган, кој работеше на посредување меѓу Русија и Украина, изјави: „Руската одлука во врска со Херсон е позитивна, важна одлука.“