Русија и Украина разменија тела на загинати војници

Русија и Украина денес разменија тела на загинати војници, што претставува најнова ваква размена меѓу двете земји од минатиот месец, пренесува Анадолу.

Рускиот пратеник во Државната дума, Шамсаил Саралиев, за медиумот РБК изјави дека Москва ги предала телата на 261 украински војник, а Киев ги предал телата на 24 руски војници.

Координативниот штаб на Украина за третман на воените заробеници подоцна ја потврди размената, соопштувајќи на Телеграм дека во земјата биле вратени 261 тело „што, според руската страна, им припаѓаат на украински војници“.

„Изразуваме искрена благодарност до Меѓународниот комитет на Црвениот крст за олеснувањето и поддршката при спроведувањето на мерките за репатријација“, се додава во соопштението.

Последната ваква размена меѓу Русија и Украина се реализира на 16 јули, кога Москва ѝ предаде 501 тело на Украина, а Киев ѝ предаде 31 тело на Русија.