Русија предупредува на последиците од можната израелска копнена операција во Газа

МОСКВА (АА) - Рускиот претседател Владимир Путин денес рече дека цивилните жртви ќе бидат „апсолутно неприфатливи“ во случај на израелска копнена операција во Појасот Газа, јавува Анадолу.

Во обраќањето на состанокот на шефовите на Комонвелтот на независни држави во главниот град на Киргистан, Бишкек, Путин изјави дека употребата на тешка воена опрема во резиденцијалните области носи значителни ризици за сите вмешани страни, но дека спроведувањето на операцијата без неа наметнува сопствен сет на предизвици.

Рускиот претседател ги обвини Соединетите Американски Држави (САД) за сегашната ескалација на палестинско-израелскиот конфликт, истакнувајќи дека Вашингтон се обидел, со помош на одредени мерки на економска стимулација, да реши политички проблем, создавањето палестинска држава.

„Актуелната ескалација е директен резултат на неуспешната политика на САД на Блискиот Исток... САД се обидоа да го монополизираат решението за Блискиот Исток, но не беа загрижени за изнаоѓање компромиси и не ги земаа предвид основните интереси на палестински народ“, нагласи Путин.

Тој истакна дека Вашингтон ја блокирал работата на Блискоисточниот квартет - групата што ја формираа Русија, Европската Унија, Обединетите нации и САД за прашањата поврзани со палестинско-израелскиот конфликт.

„Сето ова постепено доведе до денешното влошување [на ситуацијата]. За ова ќе разговараме на неформален состанок“, нагласи тој.

Путин, исто така, ја повтори подготвеноста на Русија да дејствува како посредник за палестинско-израелска спогодба.

Во драматична ескалација на тензиите на Блискиот Исток, израелските сили започнаа непрекината воена кампања против Појасот Газа, како одговор на воената офанзива на палестинската група Хамас на израелските територии.

Конфликтот започна изминатата сабота кога Хамас ја започна операцијата „Поплава Ал Акса“ против Израел, ненадеен напад од повеќе страни, со лансирање ракети и инфилтрација во Израел преку копно, море и воздух.

Хамас соопшти дека операцијата е одмазда за упадот во џамијата „Ал Акса“ во окупираниот Источен Кудс (Ерусалим) и зголеменото насилство на еврејските доселеници врз Палестинците.

Потоа израелската војска ја започна операцијата „Железни мечеви“ против позиции на Хамас во Појасот Газа.

Одговорот на Израел се прошири со прекин на снабдувањето со вода и електрична енергија за Газа, дополнително влошувајќи ги условите за живот во областа што е под опсада од 2007 година.