Руски брод истрела предупредувачки истрели кон германски хеликоптер над Балтичкото Море

БЕРЛИН (АА) - Руски брод испука предупредувачки истрели кон германски воен хеликоптер над Балтичкото Море, објавија денес локалните медиуми, пренесува Анадолу.

Инцидентот се случил за време на рутинска операција за извидување во регионот, јави германската агенција ДПА, цитирајќи официјални претставници на одбраната.

Рускиот брод наводно користел сигнална муниција, тип предупредувачка муниција вообичаено наменета за вонредни ситуации.

Претходно денес германската министерка за надворешни работи Аналена Баербок откри дека германски хеликоптер бил таргетиран од руски брод, но не наведе дополнителни детали.

„Рускиот претседател, со поддршка од други страни, дополнително ги проширува своите хибридни напади врз европскиот мирен поредок“, изјави Баербок за новинарите во Брисел, по состанокот на министрите за одбрана на земјите членки на НАТО.

Баербок ја обвини Русија за уништување на подморските кабли и попречување на GPS-каналите во регионот на Балтичкото Море, како дел од нејзината кампања за хибридно војување против сојузниците на НАТО.

„Имаше инциденти со танкери што работеа илегално таму за да ги заобиколат санкциите и инциденти во кои врз хеликоптер од Германија одненадеж беше пукано од еден од овие танкери“, рече таа без да даде дополнителни информации.

Конфронтацијата доаѓа во време на засилени напори за надзор во Балтичкото Море, каде што сојузниците на НАТО ги следат потенцијалните закани по клучната инфраструктура, вклучително и подморските кабли и цевководи. Неодамнешното оштетување на оптичките кабли меѓу неколку нордиски земји ја зголеми оваа загриженост.