Сирискиот и ирачкиот лидер разговараа за зајакнување на координацијата и економската соработка

Сирискиот претседател Ахмед ал-Шара доцна синоќа се сретна со ирачкиот премиер Али ал-Заиди на маргините на 81-то заседание на Генералното собрание на ОН во Њујорк, пренесува Анадолу.

Двајцата лидери разговараа за зајакнување на координацијата и соработката меѓу двете земји, објави денес сириската државна новинска агенција САНА.

На разговорите биле опфатени сириско-ирачките односи и начините за зајакнување на политичката и безбедносната координација меѓу двете земји, како и за проширување на економската и трговската соработка, соопшти САНА.

Канцеларијата на ирачкиот премиер во соопштение наведе дека на средбата биле разгледани регионалните и меѓународните случувања, биле разгледани билатералните односи и начините за нивно унапредување, како и напорите за поддршка на деескалацијата и намалување на тензиите во регионот.

Ал-Шара вчера се сретна и со специјалниот пратеник на американскиот претседател за Сирија и Ирак, Том Барак, во присуство на сирискиот министер за надворешни работи Асад ал-Шејбани, објави САНА, без да даде детали за разговорите.

Ал-Шара денес треба да се обрати пред Генералното собрание, претставувајќи ја својата земја.

Состанoците на високо ниво и Општата дебата на Генералното собрание започнаа вчера, при што Сирија учествува на заседанието, кое според официјалната програма на ОН треба да продолжи до 28 септември.