Суданскиот генерал Бурхан вети одмазда за масакрите врз цивилите извршени од паравоените сили РСФ во Судан

ИСТАНБУЛ (АА) – Претседателот на Преодниот суверен совет на Судан, генерал Абдел Фатах ал-Бурхан, вети одмазда за крвопролевањето врз цивилите извршено од паравоените Сили за брза поддршка (РСФ), јавува Анадолу.

„Ќе се одмаздиме за оние што беа убиени и злоупотребени во Ел-Фашер, Ел-Џенина, Ал-Џезира и во другите градови и области кои беа нападнати од милицијата на РСФ“, рече Бурхан на средбата со армиските команданти доцна синоќа.

„Кампањата што ја водат силите на тиранијата и ароганцијата против Судан ќе биде поразена, а суданскиот народ ќе победи“, изјави Бурхан, според соопштението на Советот.

Бурхан, кој е и врховен командант на Армијата, повтори дека вооружените сили се решени „да ја уништат бунтовничката милиција и да ги обезбедат границите на суданската држава.“

„Со сила, решителност и истрајност, наскоро ќе постигнеме победа над бунтовничката милиција и целосно ќе ја елиминираме“, додаде тој.

Паравоените сили на РСФ го зазедоа Ел-Фашер, главниот град на сојузната држава Северен Дарфур и стратешки важен град во регионот, на 26 октомври, и извршија масакри врз цивилите, според локалните и меѓународните организации. Ова предизвика предупредувања дека нивното преземање може да доведе до територијална поделеност на земјата.

Според извештајот на Обединетите нации од јануари 2024 година, меѓу 10.000 и 15.000 лица биле убиени во Ел-Џенина, меѓу кои и гувернерот на државата, во етничко насилство спроведено од РСФ и сојузничките милиции.

Од вкупно 18 држави во Судан, РСФ во моментов контролира пет држави во западниот регион Дарфур, освен некои северни делови на Северен Дарфур кои остануваат под контрола на Армијата. Суданската Армија управува со поголемиот дел од останатите 13 држави на југот, северот, истокот и централните региони, вклучително и главниот град Картум.

Од 15 април 2023 година, суданската Армија и РСФ се заглавени во војна која регионалните и меѓународните медијации не успеаја да ја завршат. Конфликтот уби илјадници луѓе, а милиони други се раселени.