Телата на петмина исчезнати планинари пронајдени во Непал по девет месеци

Телата на петмина планинари што исчезнаа пред девет месеци на врвот Јалунг Ри во Непал се пронајдени, соопшти денес експедициска агенција, јавува Анадолу.

Телата биле пронајдени на надморска височина од 5.400 метри во регионот Ролвалинг, откако се стопил сезонскиот снег, соопшти „Дримерс дестинејшн трекс енд експедишн“. Планинарите – тројца странски државјани и двајца Непалци – исчезнаа во ноември минатата година.

Двајца други планинари од групата претходно беа пронајдени мртви, додека петмина беа спасени живи откако лавина ја погодила групата.

Загинатите се идентификувани како Марко Ди Марчело од Канада, Маркус Кирхлер од Италија, Јакоб Шрајбер од Германија, Падам Таманг и Мере Карки.

Фурба Тенџинг Шерпа, спасувач и главен оперативен директор на „Дримерс дрим експедишн“, изјави дека телата на странските планинари ќе им бидат предадени на нивните семејства по завршувањето на обдукциите во Катманду.