Трамп потпиша извршна наредба за развој на криптовалути во САД

ИСТАНБУЛ (АА) - Американскиот претседател Доналд Трамп потпиша извршна наредба со цел поттикнување на развојот на криптовалутите во земјата и истражување на можноста за создавање национална дигитална резерва на средства, јавува Анадолу.

„Индустријата на дигитални средства игра клучна улога во иновациите и економскиот развој на САД, како и во меѓународното лидерство на нашата нација“, се наведува во вчерашната наредба.

Поголем дел од наредбата е фокусиран на воспоставување регулативи и технологии поврзани со криптовалутите и нивниот напредок во САД.

Една од клучните точки е создавање работна група наречена „Работна група за пазарите на дигитални средства“, која ќе го испитува формирањето национална дигитална резерва на средства што „потенцијално ќе биде составена од криптовалути што законски се запленети од федералните власти преку нивните активности за спроведување на законите“.

Со наредбата, исто така, им се наложува на институциите да достават препораки до работната група за регулативи што влијаат врз пазарите на дигитални средства и кои треба да бидат укинати или изменети.

Сепак, со наредбата изречно се забранува развој или издавање централна дигитална валута од Централната банка (CBDC).

Кандидирајќи се за претседател минатата година Трамп вети дека САД ќе ги направи „криптопрестолнина на планетата и биткоин суперсила во светот“.