Alperen Aktaş
04 Април 2025•Ажурирај: 05 Април 2025
ИСТАНБУЛ (АА) - Бројот на загинати во рускиот ракетен напад врз централниот украински град Крив Рог се зголеми на 16, денес изјави гувернерот на регионалната администрација на Днепар, известува Анадолу.
„Во моментов има повеќе од 40 повредени во непријателскиот напад врз Крив Рог“, објави Серхи Лисак, гувернерот на регионалната администрација на Днепар, на платформата Телеграм.
„Руска ракета погоди обичен град. Само улица. Станбена зона. Според првичните информации, се работи за напад со балистичка ракета“, напиша Владимир Зеленски На платформата Телеграм. „Мое сочувство до семејствата и најблиските“.
Тој рече дека екипите за итни случаи ги продолжуваат напорите за пребарување и спасување, а најмалку пет згради се оштетени.
„Има секојдневни руски напади. Има жртви секој ден. Има само една причина зошто продолжува ова: Русија не сака прекин на огнот - и ние го гледаме тоа, целиот свет го гледа тоа“, додаде Зеленски.
Украинскиот лидер повика на зголемен притисок врз Москва, велејќи: „Секој проектил, секое беспилотно летало докажува дека Русија сака само војна. Мирот целосно зависи од притисокот на светот врз Русија, од поддршката за Украина – на нашата противвоздушна одбрана и нашите сили“.
Претходно Олександр Вилкул, шеф на локалниот совет за одбрана во Крив Рог, изјави дека проектил го погодил центарот на станбена населба и дека во нападот загинале 12 лица, а повеќе од 50 се повредени.
Јевхен Ситниченко, шеф на државната управа на округот Крив Рог, го потврди пријавениот биланс на загинати и рече дека бројот на повредени сè уште се проверува.
Нема итен одговор од страна на руските власти во врска со овие тврдења.
Крив Рог, родниот град на украинскиот претседател Владимир Зеленски, постојано е на удар, уште од почетокот на руската војна против Украина во февруари 2022 година.
