Betül Yılmaz
01 Јуни 2025•Ажурирај: 02 Јуни 2025
ИСТАНБУЛ (АА) - Палестинската група на отпорот Хамас денес негираше дека го отфрлила предлогот на американскиот претставник Стив Виткоф за прекин на огнот во Газа, обвинувајќи го Израел дека ги поткопува преговорите за прекин на војната во енклавата, јавува Анадолу.
„Минатата недела се согласивме со г-дин Витков за предлогот кој тој го сметаше за прифатлив како предлог за преговори. Го добивме одговорот од другата страна, која не се согласуваше со ниту една од точките за кои се согласивме и не ги исполни минималните барања на нашиот народ“, истакна преку соопштение високиот член на Хамас, Басем Наим.
Тој нагласи дека Хамас одговорил „позитивно и одговорно“ на предлогот на Виткоф да се обезбеди почитување на 60-дневен прекин на огнот од страна на Израел и влез на хуманитарна помош.
„Исто така, се обидовме да обезбедиме преговорите да доведат до прекин на војната и повлекување на израелските сили“, додаде Наим.
Лидерот на Хамас рече дека Израел одбил да даде гаранции за почитување на 60-дневниот прекин на огнот и влез на хуманитарна помош.
Наим рече дека Израел „сака да преговара за мапите за повлекување договорени на 19 јануари врз основа на новото воено присуство на окупаторот“.
„(Израел одбива) да даде гаранции дека војната ќе престане и дека непријателските сили ќе се повлечат на крајот од преговорите“, додаде тој.
Отфрлајќи ги меѓународните повици за прекин на огнот, Израел спроведува деструктивна офанзива во Газа од октомври 2023 година, во којашто се убиени над 54.400 Палестинци, повеќето од нив жени и деца. Агенциите за помош предупредија за ризикот од глад за над 2 милиони жители на енклавата.
Минатиот ноември, Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел се соочува и со случај за геноцид пред Меѓународниот суд на правдата за неговите воени злосторства против цивилите во енклавата.
