Alyssa Mcmurtry
12 Јуни 2025•Ажурирај: 17 Јуни 2025
ОВИЕДО (АА) - Шпанија денес ги повика земјите низ светот да ја поддржат резолуцијата на ОН, подготвена од Шпанија, со која се осудуваат израелската блокада на Појасот Газа и насилството на палестинските територии, јавува Анадолу.
„Сакаме сите нации да се изјаснат против нехуманата блокада што Израел ја наметнува врз Појасот Газа - блокада на хуманитарната помош, на храната, на лековите“, изјави шпанскиот министер за надворешни работи Хозе Мануел Албарес за радиодифузерот РТВЕ пред гласањето на Генералното собрание денес.
„Сакаме сите да се обединиме за да ја осудиме војната што нема друга цел освен да предизвика смрт и страдање и да ја претвори Газа во огромни гробишта“, додаде тој.
Резолуцијата, која треба да ја презентираат Шпанија и Палестина, е одговор на она што дипломатите го опишаа како „неактивност“ на Советот за безбедност на ОН во врска со ситуацијата во Палестина, објави шпанскиот весник „Ел Дијарио“.
Албарес рече дека во текстот, исто така, се повикува на „реална и одржлива“ палестинска држава што ја вклучува Газа, како и на осуда на нелегалните израелски населби на окупираниот Западен Брег, „каде што секојдневно се врши насилство“.
Минатиот месец шпанскиот премиер Педро Санчез ги покани арапските држави да соработуваат за да се обезбеди успех на резолуцијата.
„Палестина крвави до смрт пред наши очи. Соочена со насилство и варварство, можна е само цврста одбрана на светскиот поредок каде што преовладува правдата“, рече тој во Багдад на Самитот на Лигата на арапските држави.
Пред повеќе од една година Шпанија стана една од малкуте европски нации што формално ја признаа Палестина.
Мадрид, исто така, повика претстојниот состанок на ОН на 16 јуни да послужи како можност за пошироко признавање на палестинската државност.
„Шпанија никогаш нема да престане да зборува за ова - укинување на хуманитарната блокада, напредување кон реална палестинска држава и осудување на насилството на Израел во Газа и на Западниот Брег“, рече Албарес.
