Јорданскиот крал Абдула ќе престојува во еднонеделна посета на Кина

Јорданскиот крал Абдула ќе престојува во еднонеделна посета на Кина, соопшти Пекинг денес, јавува Анадолу.

Абдула ќе ја започне посетата утре, на покана на кинескиот претседател Си Ѓинпинг, соопшти Министерството за надворешни работи.

Покрај средбата со Си, јорданскиот крал ќе ги посети и Шангај и Шенжен, изјави портпаролот на Министерството за надворешни работи Лин Џијан пред новинарите во Пекинг.

Ова ќе биде деветта посета на Абдула на Кина откако во 1999 година стапи на престолот.

Лин рече дека Си и Абдула ќе разменат мислења за билатерални, регионални и меѓународни прашања, а цел на посетата е „да даде позитивен придонес кон регионалниот мир и стабилност“.

Абдула ќе се сретне и со кинескиот премиер Ли Чијанг, како и со највисокиот кинески законодавец Џао Леџи. Неговата посета ќе заврши на 24 август.

Кина и Јордан воспоставија дипломатски односи во 1977 година, а билатералната трговија порасна на 6,7 милијарди долари, при што втората по големина економија во светот минатата година стана најголем трговски партнер на блискоисточната земја.

„Очекуваме економското партнерство на Јордан со Кина да го подигнеме на пошироки и подиверзифицирани нивоа на начин што ќе им служи на нашите заеднички интереси и ќе го поддржи одржливиот развој во двете земји“, изјави јорданскиот министер за инвестиции Тарек Абу Газале Абу Газале за новинската агенција Синхуа претходно овој месец.

Исто така, Пекинг соопшти дека чилеанскиот министер за надворешни работи Франциско Перез Макена ќе престојува во официјална посета на Кина од 18 до 22 август.