Јужна Кореја приведе двајца поранешни кинески воени офицери под сомнение за шпионажа

Јужнокорејската полиција приведе двајца поранешни кинески воени офицери под сомнение дека пресретнувале воени комуникации и обезбедувале доверливи информации поврзани со заедничките воени вежби на Јужна Кореја и САД, објавија локалните медиуми денес, пренесува Анадолу.

Еден од осомничените, маж на шеесетина години и поранешен припадник на Народноослободителната армија на Кина (ПЛА), наводно повеќепати ја посетил Јужна Кореја со туристички визи и пресретнувал комуникации меѓу борбените авиони и контролните кули на аеродромите, објави новинската агенција Јонхап, повикувајќи се на провинциската полиција на Јужен Ѓонги.

Полицијата соопшти дека тој дејствувал од хотел во близина на аеродром во југозападниот град Гунсан, а неговите посети започнале во јануари 2024 година и наводно се совпаднале со редовните воздушни вежби на Јужна Кореја и САД.

Осомничениот им изјавил на истражителите дека слушањето комуникации од авионите било негово „хоби“, но властите истражуваат дали информациите биле проследувани до кинеските власти.

Вториот осомничен, 45-годишен кинески државјанин од корејско етничко потекло и пензиониран офицер на ПЛА, наводно регрутирал Јужнокорејка вработена во Кемп Хамфрис, голема американска воена база во Пјонгтек, за да обезбедува доверливи информации за воените вежби на сојузничките сили.

Полицијата соопшти дека тој го прикривал својот идентитет додека работел во продавница за американски воени материјали во близина на базата и наводно ги извршувал активностите од ноември 2021 година до мај годинава.

Двајцата осомничени се соочуваат со обвиненија што опфаќаат помагање на непријателот и кршење на законите за заштита на воените информации и комуникации.