Акар: „Туркије нема да остави без одговор ниту едно грчко вознемирување и провокација“

АНКАРА (АА) - Повикувајќи ја Грција да не ја блокира понудата на Туркије да подаде рака на пријателство, турскиот министер за одбрана, Хулуси Акар, денеска потврди дека Анкара нема да ја остави Атина без одговор на какво било вознемирување или провокација, јавува Агенција Анадолија (AA).

Акар, говорејќи на настан во северната област Токат, рече дека Туркије не добила позитивен одговор од Грција за нејзините обиди за дијалог, велејќи дека Атина не помага кон деескалација на тензиите меѓу двете земји.

„Ние не ја вознемируваме и не ја провоцираме [Грција, заб. на авт.], но нема да оставиме неодговорено никакво вознемирување или провокација против нас“, рече Акар, додавајќи дека и покрај провокативниот став на Атина, Анкара продолжува со својот повик за дијалог.

Тој ја повика Грција да стави крај на своите непомирливи и провокативни ставови и рече:

„Не одложувајте да ја прифатите оваа рака на пријателство.“

Осврнувајќи се на Руско-украинската војна, Акар укажа на мировните напори на Туркије и рече дека од Украина се извезени околу 17 милиони тони жито за оние кои имаат потреба.

Туркије, Обединетите нации, Русија и Украина на 22 јули потпишаа договор во Истанбул за продолжување на извозот на жито од Црното Море, кој беше прекинат по почетокот на Руско-украинската војна во февруари. Во Истанбул беше формиран Заеднички координативен центар со официјални претставници од трите земји и ОН за да ги надгледува пратките.

Првиот брод со жито исплови од украинското пристаниште Одеса на 1 август минатата година, во рамките на склучениот договор.

Туркије доби меѓународна пофалба за својата единствена посредничка улога меѓу Украина и Русија и за континуираното повикување на Киев и Москва преку преговори да стават крај на војната.

Хулуси Акар за неодамнешниот трипартитен состанок меѓу претставниците на Туркије, Русија и Сирија рече дека Анкара ја потврдила својата поддршка за територијалниот интегритет на Сирија.

Повикувајќи го народот на Сирија да не биде алатка за провокација, Акар истакна дека главната загриженост на Туркије е тероризмот.

Министрите за одбрана на Туркије, Русија и Сирија на 28 декември се состанаа во Москва за да разговараат за борбата против тероризмот во Сирија и се договорија да продолжат со трипартитните состаноци за да се обезбеди стабилност во Сирија и поширокиот регион. На средбата се разговараше за кризата во Сирија, проблемот со бегалците и заедничките напори во борбата против сите терористички организации во Сирија.