Ердоган разговараше со палестинските и катарските лидери за израелските напади врз Газа

Турскиот претседател Реџеп Таип Ердоган одвоено телефонски разговараше со палестинскиот претседател Махмуд Абас и катарскиот емир Шеик Тамим бин Хамад Ал-Тани за израелските напади врз Газа и Западниот Брег, како и за регионални и глобални прашања, известува Анадолу.

„Привлекувајќи го вниманието на влошувањето на хуманитарната криза во Газа поради повторната ескалација на израелските напади, претседателот Ердоган нагласи дека Палестинците можат да го надминат овој процес само ако дејствуваат обединети“, се вели во соопштението на Дирекцијата за комуникации на турското претседателство.

Ердоган вети дека Туркије ќе продолжи со напорите да обезбеди гласот на Палестина да се слуша на секоја платформа.

Во одвоен телефонски разговор, Ердоган разговараше со катарскиот емир Ал-Тани за билатералните врски и регионалните случувања, вклучително и израелските напади во Газа, Либан и Сирија.

„Имајќи предвид дека со тешко срце го дочекуваме Рамазан Бајрам поради израелските напади и угнетување во Газа, Либан и Сирија, претседателот Ердоган истакна дека Туркије ќе продолжи да прави сѐ што е во нејзина моќ за да го запре крвопролевањето и страдањето и да им помогне на недолжните“, се вели во соопштението.