ХАТАЈ (АА) - Уште 5 лица се спасени од урнатините на зграда во турскиот град Хатај, дури 30 часа по земјотресите што вчера во раните утрински часови ги потресоа јужните делови на Туркије, известува Анадолу.
Бројни спасувачки тимови ги продолжуваат операциите за пребарување и спасување во обид да ги спасат луѓето останати заглавени под урнатините по разорните земјотреси.
Спасувачките екипи утрово успеаја од урнатините на зграда да спасат 65-годишна жена, по што таа е префрлена во болница.
Спасувачите, исто така, на подрачјето на Хатај успеаја од урнатините да спасат жена и маж.
Утрово од урнатините на седумкатница живи се спасени двајца мажи.
Два силни земјотреси, првиот со интензитет од 7,7 степени по Рихтер вчера наутро во 4:17 часот со епицентар во округот Пазарџик и вториот во 13:24 часот, со интензитет од 7,6 степени по Рихтер со епицентар во местото Елбистан, ги потресоа јужните делови на Туркије. Епицентрите на земјотресите се регистрирани во турската област Кахраманмараш. И турските области Газиантеп, Шанлиурфа, Дијарбакир, Адана, Адијаман, Малатја, Османие, Хатај и Килис се тешко погодени од земјотресите. Во текот на денот имаше и голем број последователни потреси со помал интензитет.
Земјотресите се почуствуваа и во соседна Сирија, но и во Ирак, Либан, Египет и други региони.
Претседателот на Туркије Ердоган информираше дека во рзорните земјотреси што ги потресоа јужните делови на Туркије загинале 3.549 лица, а повредени се 22.168 лица.
„Повеќе од 53.000 спасувачи, медицински и друг персонал се активни на подрачјето погодено од земјотресите, а со помошта од странство, таа бројка континуирано расте“,рече Ердоган.
Во акцијата за спасување досега се згрижени 338.000 лица во студентските центри и други објекти, а од урнатините живи се извлечени повеќе од 8.000 лица.
Туркије прогласи седумдневна жалост поради разорните земјотреси што ја потресоа земјата.
