Туркије ги осуди нападите на Израел врз Газа, повика на глобално дејствување

ИСТАНБУЛ (АА) – Туркије денес ги осуди најновите напади на Израел врз Газа, нагласувајќи дека масовното убивање на Палестинците означува нова фаза во, како што ја опиша, „политиката за геноцид“ на Владата на Нетанјаху, јавува Анадолу.

„Израел му пркоси на човештвото преку кршењето на меѓународното право и универзалните вредности на најтежок начин“, се вели во официјалното соопштение на турското Министерство за надворешни работи.

Во него дополнително се предупредува дека агресивните дејства на Израел ја загрозуваат регионалната стабилност во време кога се интензивираат меѓународните напори за мир.

„Агресијата што ја покажува израелската Влада ја загрозува иднината на регионот. Неприфатливо е Израел да предизвикува нова спирала на насилство“, нагласи Министерството.

Анкара ја повика меѓународната заедница да заземе цврст став против Израел, барајќи итна акција за траен прекин на огнот и испорака на хуманитарна помош во Газа.

Потврдувајќи ја позицијата на Анкара, Министерството ја истакна и непоколебливата поддршка на Туркије за палестинската кауза и посветеноста на регионалните мировни иницијативи.