Merve Gül Aydoğan Ağlarcı
10 Декември 2022•Ажурирај: 12 Декември 2022
АНКАРА (АА) - Туркије и Русија одржаа политички консултации во Истанбул во четвртокот и петокот и се осврнаа на регионалните прашања во рамките на кои Анкара ги повтори очекувањата од Москва за нејзините ветувања во врска со повлекувањето на терористите на ПКК/ЈПГ од Сирија, јавува Агенција Анадолија (АА).
Делегациите предводени од турскиот заменик-министер за надворешни работи Седат Онал и неговиот руски колега Сергеј Вершинин се осврнаа на билатералните односи, реформите на Обединетите нации, договорот за извоз на жито преку Црното Море, како и за регионалните прашања како Сирија, Либија и Палестина, соопшти денес турското Министерство за надворешни работи.
За време на разговорите, Онал ја истакнал важноста од одржување на територијалниот интегритет и политичкото единство на Сирија, како и неопходноста од постигнување политичко решение за кризата.
Туркије дополнително ја потврди својата решителност во своите напори за борба против тероризмот, против терористичката организација ПКК/ЈПГ/ПЈД, и го пренесе своето очекување од Русија да ги исполни одредбите од Меморандумот за разбирање од 2019 година во врска со терористите на ПКК/ЈПГ во Сирија.
Минатиот месец, Туркије ја започна операцијата „Канџа-меч“ во северен Ирак и Сирија, прекугранична воздушна кампања против терористичката организација ПКК/ЈПГ, која има засолништа близу ирачката и сириската граница со Туркије, од каде што планираат, а понекогаш и извршуваат напади на турска територија.
Во својата над 35-годишна терористичка кампања против Туркије, ПКК, која е ставена на листата на терористички организации од страна на Туркије, САД и ЕУ, е одговорна за смртта на над 40.000 луѓе, меѓу кои и жени и деца. ЈПГ е сириски огранок на терористичката ПКК.
