Турскиот министер за одбрана: Руската и украинската страна заеднички треба да работат за постигнување прекин на огнот

АНКАРА (АА) - И руската и украинската страна треба да работат заедно за да постигнат прекин на огнот со цел да се стави крај на војната, порача турскиот министер за национална одбрана Хулуси Акар, јавува Агенција Анадолија (АА).

„Многу е важно страните да имаат дијалог и да работат заедно. За ова, условите што ќе ги постават страните се нешто за кое тие ќе одлучат“, изјави Акар пред новинарите во главниот град Анкара по состанокот на владата.

Тој нагласи дека грижата на Туркије е да се воспостави прекин на огнот помеѓу двете соседни земји што е можно поскоро, и да се отвори патот за стабилност и мир.

„Напорите на нашиот претседател [Реџеп Таип Ердоган] траат од првиот ден. Важен придонес за светскиот мир, и важна вредност. Целиот свет треба да го разбере ова“, додаде Акар.

Туркије е меѓународно пофалена за нејзината единствена посредничка улога меѓу Русија и Украина. Нејзините напори доведоа до склучување на договорот за пренос на жито преку Црното Море со што се продолжи извозот на храна од украинските пристаништа кој беше прекинат од почетокот на војната минатиот февруари.

Ердоган континуирано ја истакнува желбата да ги собере рускиот претседател Владимир Путин и украинскиот претседател Владимир Зеленски на формални преговори во Туркије за ставање крај на конфликтот.

Акар истакна дека напорите на Туркије се важни и за НАТО и за ЕУ.

„Овој оган мора да се изгасне што е можно поскоро. Понекогаш ваквите ситуации излегуваат од контрола и можат да тргнат во неочекувана насока. Со цел тоа да се спречи, нашиот претседател продолжува со своите повици со добри намери, земајќи го предвид регионалниот мир во рамките на хуманитарните, политичките и меѓународните односи“, рече тој.

- Трилатерална средба Туркије - Русија - Сирија

На прашањето дали ќе се одржи уште една трилатерална средба меѓу министрите за одбрана на Туркије, Русија и Сирија, Акар рече: „Тоа е процес. По 11 години, таков процес започна со единствено добри намери за односите меѓу двете земји [Туркије и Сирија] и за мирот во регионот.

Акар изрази надеж дека разговорите ќе се унапредуваат преку меѓусебни преговори, кои подоцна ќе се претворат во ситуација која ќе придонесе за регионалниот мир и стабилност.

На 28 декември, министрите за одбрана и шефовите на разузнавањето на Туркије, Русија и сирискиот режим се состанаа во Москва на разговори.

На средбата тие се согласија да продолжат трипартитните средби со цел обезбедување стабилност во Сирија и поширокиот регион.

„Нашата желба е да има мир, спокојство и стабилност како резултат на овие состаноци, и нашите сириски браќа и сестри, на кои сме домаќини во нашата земја, доброволно, безбедно и со почит да се вратат во своите домови, како што е наведено во текстот на ОН“, изјави Акар.

Турскиот министер за одбрана рече дека Анкара нема да преземе никаква акција против Сиријците за да ги стави во неволја. „Затоа треба да се однесуваат со ова на ум, и да не дозволат да бидат испровоцирани“, рече тој.